Month 24 Day 28

妤妤今日第三日番學, 由媽媽負責陪伴, rundown同琴日差唔多, 係多左個做兔仔汽球手工同埋改左去露天遊樂場玩, 今日茶點係食火腿三文治! 妤妤今日無咁好乖, 玩玩具時搶左隔離同學仔件玩具, 亦都唔肯坐定定, 希望黎緊時間可以改善, 聽日係最後一日陪番學, 所以放學時媽媽就會改為o係門口等妤妤放學喇!

Month 24 Day 27

妤妤今日第二日番學, 由爸爸負責陪伴, 一返到去入課室放低書包就玩玩具, 之後鐘老師教大家今日天氣, 唔知點解今日只有五女一男六個學生, 課堂開始首先小朋友由老師帶領下去音樂室玩沙鎚唱歌仔, 之後去禮堂玩車仔, 煮飯仔同埋打波波, 然後再去廁所排洗, 跟住返去課室食茶點 (瓜肉通心粉), 唱放學歌, 就拜拜喇! 妤妤今日表現好好, 唱歌時頗有音樂感, 只有佢成身搖下搖下咁!

學校每個星期五會將手冊發俾學生, 講番成個星期學過乜, 所以今日亦都去快圖美影著住校服既學生相

Month 24 Day 26

妤妤今日開學喇! 由媽媽陪住番一個鐘, 主要係認識老師, 聽校長講話, 玩玩具, 同埋派通告!

跟住幾日都係番11:00-12:00, 到下個星期先番半日, 然後慢慢加到全日!

妤妤讀既係小組三班, 一班14人, 呢一班主要係全日班同學再加幾位上午班同學, 其中包括之前o係幼潛認識既同學鄭巧琳!

原來全日班係有埋午飯後刷牙同埋星期六有野學兼食埋午飯先走!

妤妤最鐘意個書包, 一路背住唔肯除!

Month 24 Day 25