8月28日 (星期二) 陰
今朝零晨十二點幾, BB訓左成四個鐘都未醒, 於是就抱起佢諗住同佢換片啦, 點知可能係因為又開大又開細又異常肚餓, 所以喊左好耐先搞得掂! BB日頭又係食飽就訓好地地, 但係一到夜晚又o黎料! 佢九點九食完奶之後唔肯訓, 之後到十點半就開始勁喊, 但係又唔係要整片, 同埋食完野之後個零鐘冇理由會肚餓啦; 抱佢又唔制, 俾佢飲兩啖水啦, 結果訓o左唔夠半個鐘又喊過 (好彩係夏天開冷氣, 又果係冬天開哂窗一定俾人投訴); 終於要一露俾水佢飲到佢滿意為止先得(都飲o左成半安呀). 攪到媽媽原本諗住十點鐘訓養足精神餵凌晨三點+六點o既夜奶, 結果要到成十二點先有得訓! 
BB今朝又訓得好舒服!
Carissa 呢兩日都好鐘意o係凌晨食奶果個時間便便, 仲要係幫佢清潔完之後再o黎一次. 希望佢可以改變番日頭便便啦, 因為始終夜奶時間得一個人會比較狼狽, 之但係呢d生理反應係冇得控制O既. 今曰上午媽媽又去O左中醫度推拿, 希望d瘀血可以快D清到啦. 返到屋企婆婆抱住Carissa. 平時佢訓緊覺都會e開個口笑, 但係今曰發現佢會好似大人咁'kit kit'笑o左幾聲, 仲忘形到伸埋條脷仔出o黎tim ! 唔怪得好多媽媽都唔捨得撇低bb去返工, 因為會好容易miss o左 bb 好多個第一次o架. 不過現實還現實, 要達到理想唯有努力d搵錢lu. 
另外又發現Carissa 日頭大食o左, 有時食完之後一兩個鐘又喊住要再食. 我地都唔知同唔同佢加奶好, 因為照番佢o既重量依家o既奶量應該夠. 好彩夜晚問過姨婆, 佢話有時bb食完奶喊未必真係肚餓, 因為Carissa開始大個, 有時會扭O下抱都唔定, 所以有時抱O下佢拍O下佢個pat pat安撫佢, 好過加奶俾佢飲, 因為bb唔知飽, 一陣食滯o左仲大鑊呀.
今日餵奶時發覺Carissa多左聲音, 有時候會"呀"一聲, 把聲好好聽呢! 同埋有時候見到佢訓著左摸o下佢, 佢就會好大反應咁雙手彈起, 好好笑 
今日o既相片:
1. 有雙下巴o既小蜜蜂:
8月25日 (星期六) 晴
今朝三點幾BB就扭計醒左，可能係一點幾果次既奶食得唔夠，所以就補左1oz俾BB，結果只係都係飲得半oz。不過由於爸爸太支力，所以未睇到BB兩次食完奶就訓左。BB好似比較開胃，可能要加多d奶先得! 
唔知點解Carissa近呢幾餐都比較好胃口, 食完都未同佢掃風佢已經喊住要繼續食(佢會自己'典'個身訓番低 o係你手臂上ar大口要食), 仲食到一滴不留tim (佢平時點都會食剩半安奶). 今朝兩點幾食完兩安半, 玩o下之後到三點幾又喊, 結果要補多半安奶佢先肯訓. 十點幾果餐又係, 原本諗住 S-26 比較杰同埋油, 所以唔敢俾Carissa 一次食咁多, 要佢慢慢適應; 點知佢又係食到一滴不留, 然後到12點幾(平時佢係三個鐘一餐o既)就肚餓, 結果我加多o左半安俾佢又食哂!
雖然 Carissa 食奶快o左又多o左, 但係唔代表我花o係佢食奶o既時間少o左, 因為見佢食得咁快, 反而仲擔心佢會嘔奶. 所以依家同佢掃風掃耐o左, 同埋之後一定會打直抱佢起碼半小時先放佢落床. 雖然係花時間, 但係當見到懷中Carissa 熟睡的樣子, 又真係幾可愛, 唔係太捨得放低佢o架!
1. 成日都有好多表情動作
2. BB的小腳
3. 戴帽子的櫻桃小嘴
自BB出院以後, 一直都有打電話去出生註冊處度問, 睇o下BB既資料傳到過去未, 直到琴日(8月22日), 註冊處話已經收到資料, 就決定今日下午請假去幫BB辦理出世紙, 可以早日正式申請日託育嬰園 今日中午12:45一放lunch, 即刻搭6號小巴去到紅磡火車站, 再轉火車到沙田站, 落車行無幾耐, 大約13:30就去到沙田政府合署, 由於時間尚早, 所以走去食埋個lunch, 上到去office都係13:45, 於是o係門口排頭位. 等到14:00, 後面已經排左七八個人, 一開門職員叫我入去個counter, 可能佢見我著返工衫就同我講最多14:30就可以走得, 交低左父母親身份證同結婚證書正本後坐左一陣就叫我去另外一個counter, 果度d職員好nice，可能係份工好嘆啦，佢叫我用紙寫低BB個中英文名, 我發覺之前用電腦print出黎個名既"倩"字右下角唔係"月"，係一個好似日本yen既字, 於是就更正返係要用"月", 另外, 職員同我講，話根據佢本史前字典 (香港開埠時已採用，所以點解咁多人個名譯音有錯)，"妤" 既英文譯音係 "UE" , 問我用邊個，咁我梗係堅持用"YU"啦! 攪完核實晒資料又再等兩三個字，到14:25, 交埋錢($140@)就領取到出世紙啦, 原來出世紙上係會顯示醫院度所報地址 (即係太婆個地址), 但係出世紙唔同結婚證書，父母既職業就唔會顯示，同埋原來係唔會顯示BB既姓氏! BB個出世紙編號(第時既身份證號碼)都有d難記 (而家係S字頭)
