2007年10月23日 星期二

Month 2 Day 16

因為爸爸同媽咪o既髮質都唔好, 所以為o左避免妤妤o既頭髮會同爸爸媽媽一樣又孿又硬, 今日婆婆, 姨婆同媽咪就帶o左妤妤去屯門睇蘇毛o勒. 妤妤第一次理髮扮靚靚喎, 梗係要搵個信得過o既髮型師. 因為婆婆之前去屯門果度理髮見到個老細同緊個bb 女剃蘇毛手勢唔錯, 所以去遠d都係值得o既.


今日妤妤朝早九點食完奶之後,  媽咪就用揹帶揹住佢, 跟婆婆由調景嶺坐地鐵去葵芳, 再轉巴士去屯門. 今次係妤妤第一次坐巴士呀. 到達目的地之後, 等o左一陣老闆就返o黎, 幾分鐘就幫妤妤扮好靚o勒, 之後食埋奶就回程, 返到屋企下午三點鐘. 妤妤全程都好似好enjoy, 因為除o左中途醒o左一陣之外, 其他時間都係訓覺覺. 雖然妤妤唔係好重, 同埋沿路都有得坐, 但係媽咪發現原來揹住妤妤咁多個鐘都幾支力.


返到屋企, 媽咪同婆婆都封o左利是俾妤妤賀佢剃蘇毛之喜, 而我地都留番哂佢d 頭髮放入個利是封度留念. 你睇o下佢手仔揸住d 利是幾開心! 我諗佢好快識得同人豆利是:




妤妤o既光頭look...似唔似一休小和尚呢:





媽咪特登攞塊HELLO KITTY 布去同妤妤乘住d頭髮. 呢d 係一小小部份咋. 其他入哂利是封度:



妤妤o既戴帽look:




1 則留言: